洪家耀，70後，香港少數鯨豚專家，海洋公園日前爆出海豚加班變相虐畜風波後，他連日接受傳媒訪問，鞭撻有加。由狂批掛保育羊頭引入野生巨鯨，到踢爆可愛小企鵝亮相娛賓前死傷無數，別人以為他與海洋公園「有仇」，他說只因愛之深。原來，十幾年前，剛由美國返港的他，研究辦公室正設於園內，雙方由親密戰友到漸行漸遠，對於這個管理封閉的「保育樂園」，他有話要說。
記者：呂麗嬋
「回歸前，我喺美國讀碩士，研究海洋生物，呢一科，喺香港比較冷門，嗰時咁啱新機場落成，政府請美國教授Thomas Jefferson，協助研究工程對中華白海豚嘅影響，我係當地少數熟悉鯨豚嘅地道港人，書未讀完，就獲聘飛返香港，幫佢做鯨豚生態研究。眨吓眼，一做十幾年。
教授當年係海洋公園保育基金會成員，研究辦公室順理成章設喺園內，雙方並不從屬，但就識咗好多喺入面做嘢嘅獸醫同職員，亦會客串吓講座。咁多年嚟，海洋公園努力塑造保育形象，話你知海豚最鍾意頂波、搖尾，但事實係佢哋唔跟住做會受罰，擴館引入瀕危野生動物，有病、死咗，統統冇通報。
佢哋封閉嘅管理方式，令我哋漸行漸遠，好多人依賴保育基金資助，敢怒不敢言。近呢一年，盛智文入主，佢比較開放，溝通多咗。我同佢講，海洋公園號稱亞洲水族館典範，點解封閉到問擴館引入幾多條藍鰭吞拿魚都唔敢答？又反保育世界潮流，認定引入珍禽異獸，要啲海豚做啲違反本性嘅動作，就係吸引人流嘅靈藥？有啲人話，去海洋公園係為咗認識海洋生物，我話，你想認識人性，你會選擇去監獄觀察啲囚犯揼石仔嗎？見到海洋公園掛保育羊頭吸水，好心傷。
我喺香港出世，同好多香港人一樣，對海洋公園有情意結，見到可愛嘅海豚會好開心，但當你認識到佢哋被困喺水族館背後嘅故事，就係另一種心情。真正愛上海洋，係喺加州讀書，嗰度背向太平洋，到處海洋館，令我發現另一個新天地。除咗研究活鯨豚，我仲為漁護署處理擱淺鯨豚屍體，從牙齒、骨骼，甚至DNA化驗，掌握更多數據。
鯨豚研究係我第一份工，希望亦係我最後一份工。今後海洋公園做得唔好我仍會批評，責之切，只因愛得深，不是嗎？
