林嘉欣靈機一動，想出T恤設計比賽，讓小朋友將對環保的想法畫在T恤上。黎樹雄攝
讀書唔叻無技能，性格內向又欠自信，18歲美少女林嘉欣一直以為自己一無是處。殊不知誤打誤撞，去年的「暑期功課」成就了逾5,000名小學生的環保夢，亦令小妮子發現將勤可以補拙，只要努力一定有所作為，重建自信心，向人生夢想進發。
記者：趙琦
「我中一至中三讀書成績唔好，無法坐定定專心背書，又冇一技之長，覺得自己好平庸，加上性格內向，唔係好識表達，所以冇乜自信。父母賺錢唔多，住喺公屋；我係長女，媽媽想我讀多啲書，將來條路可以好行啲，但面對人生轉折點，我唔知道升上中四後，能否應付學業，對前路好迷茫。
反思環保靈機一動
中三暑假，社工推介我參加『暑期職志體驗生』計劃，到華懋集團實習，第一次到寫字樓上班，連該着乜嘢衫都唔知道，諗唔到首天開工，上司竟然叫我構思舉辦一個關於環保嘅活動。唔係啩？我只係一個乜嘢都唔識嘅小妹妹。對我而言，環保只係簡單嘅慳水慳電，將唔着嘅舊衫攞嚟當睡衣，究竟乜嘢係環保？我靈機一動，不如搞個T恤設計比賽，畀參賽者發揮創意，將自己對環保嘅想法畫喺T恤上，小朋友可以透過畫畫反思環保嘅重要性，着上T恤就等於流動環保廣告，唔需要再印製宣傳單張，浪費紙張。
以為諗完活動大綱就大功告成，但上司一句『你預算用幾多錢？有乜嘢獎品？』，我啞口無言，於是再重新做一次資料搜集，請教社工學做計劃書。
滙報緊張過考試
我講嘢唔叻，要喺十幾個上司、社工面前滙報工作，對我而言係好大挑戰，緊張過考試，但我學識做個有責任心嘅人，就係盡力完成老細交落嘅工作。當我知道公司決定採納我嘅意見時，超級興奮，原來只要我肯努力去試，我都可以做到，我唔係想像中咁冇用，對自己有返自信心。我決定唔升中四，報讀專業美容課程，努力學好興趣，一樣有出路。環保T恤設計比賽吸引逾5,000名幼稚園和小學生參加，有關作品更成為11月4日舉行嘅華懋慈善行活動T恤。」
