余翠怡，28歲，兩屆奧運女子輪椅劍擊金牌得主。11歲罹患骨癌，接受化療後傷口發炎，切除左腳小腿裝上義肢。童年的不幸，卻成就了一位奧運冠軍人物。她正積極備戰月底舉行、緊接奧運的殘奧會；又與廣大市民一樣，每天緊貼倫敦奧運比賽，見到韓籍劍擊運動員申雅嵐，因評判誤判痛失入決賽資格，感同身受，且聽一代劍后怎麼說。記者：呂麗嬋
「第三次參加殘奧會，現時除咗專心一星期五日喺體院接受訓練，備戰月底嘅賽事外，我同一般市民一樣，每日都會追睇奧運比賽。作為劍擊運動員，特別留意南韓選手申雅嵐嘅新聞，佢因為計時器嘅問題，輸咗比賽，喺場館內痛哭唔肯走嘅一幕，好難忘。
06年，我參加世界盃輪椅劍擊賽，嗰次比賽，評判出現好多爭議判決，結果，我輸咗場比賽，同時亦輸掉信心。事後，好多人行埋嚟安慰我，但我無法平復心情。只係不斷問：原來有好多外在因素，令你嘅努力付諸東流，咁我點解仲要辛苦訓練呢？一剎那，走唔出困局。
患得患失嘅心情，令我進入前所未有嘅低潮，比賽時無法專心，成績大倒退。嗰時，我未停止接受訓練，但我意識到出現咗問題，於是尋求心理輔導，學習調節自己嘅心態。長達大半年嘅治療之後，終於走出低谷，找回比賽嘅信心。作為運動員，平日艱苦練習，未計受傷，可能只係換到一張奧運會嘅入場券；成績係點，仲要睇心理質素，臨場發揮。
困難重重，但我仍然享受運動員生涯，這可能與我不服輸嘅性格有關吧！這些年，很多人都問我，11歲患骨癌，你是怎樣熬過來？我就話，我反過嚟要多謝我呢個病，如果唔係有癌症，失去咗一條腿，我都唔會接觸到輪椅劍擊，成為運動員，甚至取得奧運金牌，走遍世界各地比賽。
從發現癌症到接受換骨治療，前後超過兩年，不停進出醫院，好在病發時年紀小，想法簡單直接，唔會諗乜嘢前途問題，只知要聽醫生話，就可以離開醫院，重過以前嘅生活。原來，當你學識放手，反而得到更多。所以，做人好、比賽好，往前望，過去的就讓它過去吧，呢一刻，全力以赴就好。」
