霞姐用這架古董衣車來縫製環保時裝紀念亡友。
林桂霞，五十後，長者善終社團榕光社創辦人，外號「夕陽送行者」，專助孤寡長者完成遺願。最近，霞姐搞搞新意思，利用米袋和紅白藍膠袋，設計系列環保時裝，又集結一班六、七十歲的婆婆，組成另類耆英團，在老人院舍巡迴演出行catwalk。但原來，出位的「華衣」背後，有段鮮為人知的感人小故事，且聽熱血霞姐怎麼說。
記者：呂麗嬋 攝影：黃耀興
「五、六十年代，香港製衣業好蓬勃，我喺辦房做，跟上海師傅學師。後來製衣廠北移，我又結婚生仔，就無再點車衫。事隔多年重操故業，全因一個老人家嘅生前心願。呢部陪伴我哋呢一代人成長嘅腳踏衣車，係一個姓梁婆婆最珍貴嘅遺物，亦係佢留畀大家最後嘅一點心意。
古董衣車遺物的啟發
梁婆婆，係一個獨居老人。佢聯絡我哋時，乳癌已到末期。梁婆婆有兄弟姐妹，但早已不相往還。佢話唔想死後孤伶伶，一個人被葬去沙嶺，墓地只剩一個數字，所以冒昧來電，想委託我哋幫佢辦身後事，死後可以海葬，幫佢達成心願。我哋後來做咗朋友，定期家訪，陪佢覆診；佢喺醫院彌留期間，我哋陪住佢，送佢最後一程。
架衣車，係婆婆留畀我哋嘅遺物，機械零件仍然運作良好。我就諗，不如就利用梁婆婆嘅寶貝，車一啲衫畀其他老人家，等佢哋着得靚靚，行吓catwalk，咁唔係好有意思咩？坐言起行，由構思到落手落腳起好紙樣造衫，前後花咗20日。六個婆婆穿上新裝，各有造型：露臍裝、用七彩環保袋車成傘裙，仲有利用米袋造嘅水靴。
立志為獨居老人送終
所謂嘅另類耆英團，就喺梁婆婆嘅祝福下應運而生，仲有老人院邀請我哋去表演，咪話唔威！其實，每個人都有心願。小時候，屋企好窮，家住李鄭屋木屋區，嗰度住咗好多退咗休嘅獨居媽姐，半世人勞勞碌碌，每次講起要孤獨終老，無不淒然。當時，我就立定決心，長大之後，要為孤寡老人送終，好想話畀佢哋知：你哋其實並不孤單。」
