項明生（右）到秘魯旅遊，被當地人熱情所感染，與樂隊打成一片。受訪者提供圖片
地球很危險？對不認識香港和秘魯的人來說，兩地的共通點可能就是危險。因為一套《古惑仔》，有內地人以為香港周街都是黑社會，令旅遊達人項明生啼笑皆非；亦有電影將秘魯描繪成毒梟藏身地，但他走遍大半個地球後，卻視秘魯為最愛，更出書分享秘魯之美，暢談異國風光。
記者：趙琦
在秘魯的「天空之城」馬丘比丘，項明生與當地小孩合照。
「好多朋友認為秘魯治安差，怕危險而卻步，但我一個人喺秘魯留咗十幾日，安然無恙，當地人嘅熱情更超乎我想像。有一日我到著名嘅熱水鎮閒逛，見到一大班人枱住聖母像經過，於是跟佢哋行去街市廣場，佢哋將聖母像放好後，逐個逐個走上前獻花頌經。後來佢哋發現咗我係遊客，專登搵張凳畀我坐低觀賞。
內地人誤會香港好危險
去旅行唔可以道聽途說，要親身體驗。有內地讀者喺網上留言問我香港係唔係好危險，話佢媽媽禁止佢聖誕節來港玩。原來佢媽媽係鄭伊健粉絲，鍾意睇《古惑仔》，以為香港通街都係金毛飛仔，同埋經常發生槍戰。
我認為秘魯係人生必到景點，其獨特文化遺產無可取代。多年前睇過台灣作家三毛的《萬水千山走遍》，已對秘魯充滿好奇，不停想像呢個世界七大奇景之一、俗稱「天空之城」的印加遺址馬丘比丘（Machu Picchu）係點嘅樣。去到當地，我急不及待買咗件秘魯傳統服飾Poncho（斗篷），學三毛書中描述，登頂搵一塊石頭打坐，希望可以如三毛一樣『撞鬼』，感受靈體喺身邊飄過。但坐咗十幾分鐘，未知是否當日天氣太好，旅客太多，無法如願。
受全球一體化影響，好多大城市已變得大同小異，無論身處東京或北京、倫敦或巴黎，都見到一樣嘅名牌店、連鎖咖啡店，尤如去尖沙嘴廣東道一樣，冇咗旅行嘅感覺。香港人鍾意去旅行，但太集中東南亞地區呢啲短途地方，而我會儲起年假去偏遠嘅陌生國度，到尚未被同化嘅城市，體驗另類文化，開拓眼界。」
