【本報訊】「只要我一息尚存，也忘不了您。」60歲的陳志祥（祥哥），在電台點唱《忘不了您》表達對妻兒的思念。他大半生沉淪毒海，進出監倉11次，更連累懷孕妻子坐監，幼子也在獄中出生。最終妻兒出走，20多年來音訊全無，如今祥叔改過自新，在五金舖做雜工，前日在facebook尋找妻兒，「想親口講聲對唔住！」
記者：吳淑義
祥哥牙齒掉落得所餘無幾，都是吸毒的遺害，「爸爸都係吸毒，令我好奇吸毒感覺係點，到16歲打交入教導所試咗毒品，折磨一生」。年輕時的祥哥脾氣暴躁，18歲在石硤尾街市邂逅妻子，但婚後仍與社團為伍，「1976年，喺青山道爭地盤劈友，劈中人條頸，佢流血過多救唔番。我被判誤殺坐足12年監，嗰時大仔得兩歲」。
「一生害死三個人好內疚」
還柙期間他向懷孕妻子訛稱無毒品受盡折磨，「老婆好憎人吸毒，但唔忍心我咁慘，帶毒品嚟探訪，第二次俾人拉咗，判半年監，細仔出世紙寫住喺監獄出生，怨足我一世」。他出獄後與家人居於沙田隆亨邨，「大仔帶同學嚟玩，見到我吸毒，返學校唱，個仔抬唔起頭做人，自此唔睬我」。
至1988年，祥哥駕貨櫃車在荃灣福來邨撞斃一對婆孫，判囚兩年，「一生害死三個人，對唔住佢哋家人，家屬問點解唔判我死刑，我好內疚」。監禁期間妻兒悄悄搬家，自此音訊全無，祥哥把兩幀全家福照片帶在身上，「喺兵頭花園影嘅黑白相，好掛住佢哋」。
祥哥多次進出監倉，近年戒除毒癮，在街頭露宿多年。今年2月15日，食環署在深水埗通州街強行清場，把祥哥的證件及家庭照當垃圾丟掉，「張相對我好重要，要告政府討回公道」。
他指清場後，房署加快讓他入住石蔭東邨公屋。前日他透過facebook尋找56歲妻子梁慧萍、38歲長子可威及36歲幼子可勇，「唔敢叫家人接納我，但最少可親口講句對唔住」。
