陳燭光（左）因母親猝死患上抑鬱症，其後接觸拉丁舞走出傷痛。
陳燭光，生於大富之家，父母兄姐的掌上明珠。父親陳樹渠是著名教育家、寶聲集團創辦人；母親陳麗玲是商界女強人。她是家中么女，衣食無憂。07年底，母親因使用過量止痛貼猝死，自此由天堂跌落地獄：失眠暴瘦至90磅，患上抑鬱症。身陷人生低谷，卻因愛上跳舞，走出陰霾。習舞短短一年，去年底仍是新丁的她，更爆冷贏得全球舞王挑戰賽拉丁舞冠軍，為亡母跳出奇蹟。
記者：呂麗嬋
童年的陳燭光與父親陳樹渠和母親陳麗玲合照。
「我有四兄弟姐妹，家中排最細。細細個，爸爸就過身，媽咪喺股票行工作，好忙。媽咪話，我喺美國出世，係早產嬰，醫生話唔可以太快搭飛機。所以咁多個仔女中，只有我無交畀工人湊。唔知係咪咁，我同媽咪特別親密，由細到大，我都好依賴佢。大學讀經濟、畢業後入股票行工作，都係媽咪幫我揀。
曾暴瘦至90磅
喺我心目中，媽咪係可以撐起半邊天嘅女強人。我自細嘅衣食住行，乜都唔使諗。07年佢突然離開，我覺得個天冧咗。嗰時，真係好灰，晚晚失眠，乜人都唔想見，暴瘦到只剩90磅，皮包骨，好唔開心。
自困愁城兩年，有個醫生朋友話，你咁樣唔係辦法，不如學吓跳舞，當強身健體。我細個學過芭蕾舞，好鍾意跳，只係媽咪怕我練到腳粗，被迫放棄。我當時就諗，姑且一試吧。點知一跳就愛上，最初跳爵士，後來改跳拉丁同Ballroom dance。喺舞池，同舞伴手拖手、轉圈，只有音樂和舞步，渾然忘我！
仿似發現全新嘅世界！搵最頂級嘅老師單對單教舞，上網研究國際賽表演偷師，喺客廳搬開啲傢俬練習。日跳夜跳，自然進步得快。上年3月，舞社鼓勵我公開表演。有咗目標，練得更瘋狂。第一次喺大班陌生人面前跳，緊張到不得了，由set頭改舞衣到練習。四分鐘嘅一隻舞，足足預備咗四個月！
過程好辛苦，我知道，呢一次再冇媽咪幫我安排一切。但我永遠唔會忘記，音樂一停，喺舞池上雷動嘅掌聲。媽咪喺天上會看到，我做到了。」
