賴恩慈今年以諾貝爾文學獎作品改成舞台劇「㷫」回歸。羅君豪攝
「呢套劇，改編自1997年諾貝爾文學獎得獎作品，講高鐵爛尾，一個示威工人喺接受警方盤問時，離奇墮樓死亡嘅故事。排練時，剛好發生李旺陽事件，劇本內嘅鐵路工人被墮樓，李旺陽被自殺。荒謬嘅現實，竟同故事不謀而合。係李旺陽嘅死，令我哋同套劇嘅感覺拉近咗，但唔知應該喜，定係悲。
人生果真如戲，六歲前，我喺鄉下生活，輾轉來港，被養父母收養。中學時讀庇利羅士，好多測驗考試，只有排戲時同學之間最冇競爭。中四嗰年，我寫咗個關於慰安婦嘅故事，老師當年嘅評價係：編、導、演都好，但過於暴力。嗰時我會問：真實嘅歷史，唔係更暴力咩？好多疑問，冇答案。
中學時埋下種子，到我03年讀浸大，認識到『好戲量』，開始參與社會性嘅街頭劇，呢粒種子開始萌芽。曾幾何時，我同好多人一樣，認為讀好書，搵份穩定工作，業餘做話劇就好。用正職滋養興趣，唔敢行自己鍾意嘅路。係劇團教識我，理想唔單係想，仲可以實踐！戲劇唔係純粹做戲，仲可以改變社會！
一個決定 踏上自由之路
大學期間，我開始拍社會性題材嘅嘢，拍馬檻嘅故事、追蹤長毛，去南美尋找哲古華拉。三年大學，試過因為拍攝啲題材太敏感，教授唔肯借器材，喺走廊上鬧翻。06年畢業，順理成章加入劇團，嗰時嘅諗法係，用三年時間實踐理想。結果三年又三年，轉眼已經九年，我仍喺劇團，創作可以影響其他人嘅戲劇。
我最記得，喺浸大讀year 2，開學第一日，我已決定由英文系轉去電影電視系，我最記得，個教授同我講，你要諗清楚，喺英文系畢業，教書起薪點萬七，拍劇收入可以有幾多？老師或者講得啱，但當有一日，你唔再考慮錢嘅問題，你就係一個真正自由嘅人，人生，可能會多好多選擇。」
