消委會早幾日派人去咗上水格價，睇吓啲日用品同包裝食品邊度平，等爽妹同大家介紹吓喇。
新豐路新龍豐藥房賣嘅日用品，有好多都好平，好似萬潔靈潔廁漂$11、呼佳鼻塞噴霧劑$27、施巴嬰兒潤膚乳$53等。
彩園邨尚御藥房都有唔少平貨，例如妮維雅淨白止汗走珠香氛賣$19、力士水潤絲滑洗髮露賣$31.5、多芬深層滋養沐浴乳賣$32。
去開彩園邨，可以去埋和豐糧食雜貨，買$2.5嘅匯泉啤酒、$16嘅史雲生調味雞汁，同埋$10嘅左顯記桂林椒醬。
新勤街嘅國華參茸海味行，包裝食品都好平，包括賣$5嘅家樂牌鷹粟粉、賣$28嘅刀嘜純正粟米油、賣$12嘅天龍牌豆豉鯪魚。
詳情可上消委會網頁www.consumer.org.hk瀏覽
