做了娛記20年，見盡娛樂圈興衰變化，Michelle直言，記者與星，各為其主，「陳寶蓮當年喺上海自殺，我同吳君如就拗到七彩。佢話唔應該影，我話我係記者，做得呢行，出得老闆人工，一定要影。影完之後點處理，出唔出、局部出，可以再討論。」對一件事的看法，無對錯，只因位置不同，觀感各異。Michelle謂，自己公私分明，報道出街，與藝人仍是朋友，她也從不以做娛記為恥，「我pround of自己係娛記！」她斬釘截鐵的說。
「做港聞都有人渣，唔好一竹篙打一船人！」她反而受不了今天的娛記太無知，「啱啱有雜誌先寫，話林子祥個仔同個中年女人飲茶，嗰個其實係佢阿媽嚟，點解咁都唔認得？我仲喺周刊做嗰時，知道任劍輝、白雪仙會出現某個場合，叫嗰記者去，結果個記者無相返，佢話唔認得任劍輝！連基本功課都唔做，點配做呢行？」
被譽「狗仔隊之母」
中學畢業即加入雜誌社做娛記，升至管理層，Michelle祟尚西方深挖秘聞式的報並方式，與查小欣等被稱為「狗仔隊之母」。40歲那年，適逢俞琤邀請她加入商台，自此走進電子媒介，遊走於電台及電視台，擔任主持；又以43歲高齡初登銀幕，在電影《內衣少女》穿上性感喱士內衣扮老姑婆，仲和藝人阮兆祥扮兩生花。人生，確有無限可能！
