「 我嚟自典型嘅中產家庭，家住海怡半島，讀直資學校，有個讀小三嘅細佬。爸爸係IT專才，媽媽同爸爸係港大校友。自小，我算得上生活無憂。但我好清楚，呢種幸福，並非必然。因為自六、七歲開始，爸爸就帶我探訪赤貧家庭，去板間房。佢成日同我講，要關心社會上被遺棄嘅一群。
反高鐵運動助開竅
爸爸係虔誠基督徒，佢話，社會上有一啲人生活好困苦，我哋唔可以坐視不理。我仲記得，爸爸喺屋企睇紀錄片，見到內地基督徒被迫害、連講句說話都唔敢，佢會激動到眼泛淚光。細個嗰時，我會問，點解我嘅生活咁豐足，但好多人嘅生活就咁艱難？種子喺我小學時已在心中，但一直冇機會萌牙。
中三之前，我同好多中學生一樣，食飯打機瞓覺讀書。直至反高鐵運動，接住嘅五區公投，討論喺網上百花齊放，開始引起我對社會議題嘅興趣。好多疑問，為咗同人喺網上火拼，我開始搵好多書睇。中三嗰年，對我嚟講，好重要，我意識到，貧富懸殊，包括好多社會問題，歸根究底，都係制度出咗問題。
知得越多，越希望改變，唔再甘心只停留喺網上討論嘅狀態。上年5月，教育局推出國民教育嘅諮詢文件，社會上討論嘅氣氛毫不熱烈，但我和很多年紀相若嘅朋友，都好關心。我覺得係時候站出來，走上街頭，學民思潮因而成立。由最初只有十幾個人，到後來集結到其他學生組織，搞街站、籌組大型示威遊行，逐漸成型。
而爸媽亦由擔心，到後來好放心。因為佢哋知道，我唔係人云亦云。熱爆嗰段片，有網民話黃之鋒嘅父母，應以佢個仔為榮，我唔知媽咪係咪真係可以我為榮，但我希望，將來我可以為我自己所做嘅，感到自豪。」
