洋名Jenny的傅蕾蕾，國畫大師後人，但小妮子在面書所開的群組，卻叫「Jennypat's Doodles」，自稱「亂畫」。漫畫大部份取材自家中三隻小狗。比如失戀，家中古古惑惑的芝娃娃，會安慰她「腦袋不中用就甭想太多」；媽媽在她筆下，就成了拿着大鑊鏟的「巨人」，單單個黑影，已可閉天遮日！「媽咪成日話我大唔透！」就是開了不久的微博，開版相清湯掛面，嘟着嘴食意粉，也充滿童真。
「以前住九肚山，試過劫匪入屋，只有我嘅夾萬佢唔吼，因為入面放嘅，都係我珍藏咗好多年嘅龍珠閃卡。」回憶無價，但經Jenny賣出的珍品，卻統統是天價。2010年，外祖父傅抱石的力作《琵琶行》，便以逾七千萬港元成交，刷新紀錄。當時，中國珍品市場買賣火熱沖天，傅蕾蕾正是佳士得的中國書畫鑑定師。
「在佳士得工作期間，公公大部份嘅畫都由我處理，但講真，就算有血緣關係，都未必代表認識更多。鑑定古物古畫，天外有天，永遠學唔完。初入行，好心虛，別人講兩句，自己學一句，要認清一幅畫係咪真跡，定係清朝畫家臨摹？明朝畫家嘅作品，對買手來說，唔係學術問題，而係商業買賣的需要，買入膺品，隨時血本無歸。」她認真的說。
系出書畫世家，Jenny的母親傅益璇，是著名畫家，也是傅抱石次女。Jenny原本姓畢，父母離異後跟隨母姓。「因着公公的緣故，我們家族差不多全部都係畫家！」在港完成中小學後遠赴加拿大，讀數出身的Jenny，在家人游說下轉讀藝術史，「大學時讀到有關公公的文章，先知他是上世紀最重要的藝術家之一，之後我開始廣泛研究中國畫，也造就了我現在的職業。」
06年，傅蕾蕾回流香港，2010年加入佳士得，其後自立門戶，成為獨立藝術經銷商，穿梭世界各地，參加拍賣會和展覽，憑着自己的眼光，賺取高級藝術品買賣的差價，「拍賣行買賣頻繁，見到各式各樣的人，好有趣。」最身光頸靚的大款，原來是空心老倌；其貌不揚，卻一擲千金。坐過富豪買家的私人飛機齊齊去看畫，Jenny說這份工高風險，但新奇又刺激！
事實上，還只是初中生的Jenny，已跟隨媽媽到拍賣會見識；二十出頭，小妮子代表富豪uncle在大型拍賣會「舉手」出價，以千萬元投名畫寶物。半生見盡名畫珍品，動輒千萬甚至上億。金錢，在現實社會或許不可或缺，但漸漸卻成了數字遊戲。讀藝術的Jenny自言珍品有價，但她最愛的，還是古物古畫背後一個個動人的時代小故事。
「做傅抱石的外孫女，最大好處是聽到好多鮮為人知的故事。呢幅畫當年點解要用呢種紙？只因當年周恩來剛剛送來一卷紙，佢唔可以唔用。又或者點解呢幅畫用得紅色特別多？畫家創作時是怎麼樣的心情？真相可能係嗰日紅色嘅顏料切多咗，藝術家咁窮，當然唔好嘥。」 Jenny微笑。
愛聽小故事，拜師學過裱畫又愛手作的Jenny，閒時會親自修復書畫收藏，藉機學習分辨作品的細微差別，「買賣中國畫，最重要是鑑定部分，因為市面上有太多膺品！」可幸職業生涯中，未試過因為「入錯貨」而損手。過去，她還因為修補得宜，其中一幅藏畫以原價十倍的金額賣出。又試過在十九歲時，用三萬港元購入了生平第一幅畫，十年間以25萬售出，回報可觀。
「近幾年，歐洲嘅藝術品市場，買賣好蓬勃，經濟轉差，好多收藏家攞珍藏出嚟拍賣套現，過去一年，就試過兩個月內飛歐洲六、七個國家，見到好多你過去從無機會見到的頂尖收藏。」周遊列國的生活，樂在其中，文稿見報時，Jenny剛自英國公幹回港。只是人在異地，難免思鄉，她笑說，人在旅途，每每最想念的，不是價值連城的寶物，而是等著她回家的小狗！
