戇直青年自資出月刊派街坊，鬥志可嘉。黃冠華攝
我今年27歲，係正宗冇車冇樓冇女朋友嘅「N無人士」，同父母及一對細佬妹住西環400呎私人樓，喺廣告公司做行政工作，人工兩萬以下，唔使旨意買樓囉。
我係嶺南大學中文傳媒寫作副學士，畢業後做過兩份政府文職，上年喺環保署做文員鬼咁得閒，於是開始寫小說。出版《特寫》係受到《黑紙》啟發，大家都係一張紙唔使釘裝，慳成本。上年5月開始搞出版社，到7月見到《二字頭》派發，青春火熱令到我好激動，激發要做好自己嘅月刊，上年8月創刊，今個月出第九期。
𠵱家份工好勞役，但收工後都堅持寫作，小說內容主要嚟自生活感受，但有一半係改編。開頭印3,000份，700蚊，後來想多啲人睇，用800蚊印4,000份，每個月到唔同港鐵站派10晚。曾經見到地面或者垃圾桶有人丟咗，都會執番再派過，心血呀。
暫時收到嘅評語都係正面，但細妹睇完就話：「唔好嘥錢，你注定失敗㗎，寫埋啲垃圾，香港人唔會睇。」其實我哋好鍾意互相激對方，我點都會寫落去。
梗係想出書，但最大理想係先做好份月刊，能夠寫作已經比其他都市人幸福。
《特寫》網址：http://onlywritehk.wordpress.com/
