梁振英話唔明興建公屋為何要七十個月咁耐，佢認為只要落實新政府架構，就有望縮短到六十個月，即係五年云云。沙膽虹唔知落實新政府架構跟縮短公屋興建期有乜關係，但如果要起樓起得快就話咁易啦，只要問問佢老友跟支持者上海姑爺羅康瑞就得啦。
九龍灣麗晶花園這個咁龐大嘅私人參建居屋計劃，就是羅康瑞旗下瑞安興建嘅。呢個有近六千個單位的大型居屋，你估瑞安用多少時間起好？只係二十個月！八三年八月施工，八五年四月完工，亦因此為瑞安帶來過億盈利。雖然𠵱家一億元就好濕碎，但八五年香港風雨飄搖時，一億就好大！李超人黃埔花園當年補地價亦只兩億多！這次是上海姑爺嶄露頭角的代表作。
這類私人參建居屋計劃，玩法特別，由承建商出價競投，並出資興建，而政府則承諾以一個特定價錢購入將來起好嘅單位。換言之，承建商已確定將來收入，因此只要打入建築費和利息成本後，就是投標價了。八十年代中，美國瘋狂加息壓抑通脹，香港利息高達十多厘，因此能越快起好交樓收錢，就越省利息開支！羅康瑞當年就是為了省利息，將本來三年的工程，壓縮至二十個月完工，節省利息逾億元，袋袋平安。
沙膽虹
