「呢度係咪有得學泰拳？打泰拳，手臂真係可以瘦啲㗎？」與Venus約好在太子的拳館接受訪問，總不難遇見慕名拜師的單身女子登門。「學泰拳，啲肌肉可以firm啲，𠵱家開始熱，好多人想着衫靚，就嚟學，我以前學泰拳，唔多唔少都係呢個原因。」剛摘下女拳王金腰帶的Venus笑着說。
不同的是愛美OL學完一個夏天鬆人，Venus就越學越入迷，仲做埋女拳王。學了七年泰拳，四年前剛滿十八歲，即參加首屆中國全國泰拳冠軍賽，爆冷奪得冠軍，初露頭角。其後自09年開始，連續三年於香港泰拳冠軍賽不同組別，分別取得冠軍名銜。包括以45公斤的體重，越級挑戰51公斤組別，與重自己超過十磅的拳手對壘，同樣大勝而回。
「一般拳手唔會讓磅下比賽，磅數越重、出拳嘅力度就越強，但因為喺本地賽事，我同師傅商量好，希望將難度提昇，等將來參加國際賽，面對同級別嘅拳手，贏面較高。」個子嬌小、總愛「負磅」上陣的Venus解釋說。
每個職業拳手，在出賽前一日，均需上磅，確定正式比賽時參加的級別，即俗稱「過磅」，「通常兩至三公斤一個級別，好多拳手臨上磅前，都會禁食同焗汗，一過完磅，好快就反彈番兩、三磅！」別人希望體重佔優，增加贏面，Venus就反其道、「負磅」越級挑戰重過自己的對手！
最誇張一次，是2010年一次本地比賽，泰籍對手高過她大半個頭，比她重足足八公斤，相差達三個級別，主辦單位大為緊張，以安全和公平為由，提醒她三思，就連對手都認為自己體重佔優，勝之不武，但小妮子卻堅持比賽，寧願與對手簽下生死狀，膽正命平。
「大家企喺擂台，就應全力以赴。體重輸蝕，Venus在師傅教路下，採取以快打慢策略，藉速度及技術佔先機。結果雙方打足五個回合，最後她以點數勝出，令拳館上下，士氣大振，「證明咗自己嘅實力，更加證明咗香港泰拳嘅水準，已達世界級。」說時一臉自豪，無怪Venus上周一再下一城，贏了世界賽，一舉成功。
天生有鬥心，固然是致勝關鍵，但Venus不諱言，四年前決定打職業賽，全因想「報恩」，她說：「以前好無目標，自從嚟咗跟師傅學泰拳，真係唔同晒，從來無人好似佢咁關心我，之前學化妝，做得唔開心，師傅主動叫我嚟拳館幫手，又鼓勵我考教練牌，自己做教練。」
Venus口中的師傅恩人，正是多次代表香港出外比賽、師承泰國陸軍搏擊顧問A.Sanapak的剛嵐泰拳健體中心總教練柯尊鼎（Ray）。「一般人總希望贏，Venus唔同，佢希望對手難打、厲害。難度越高，越專心，好少見。」Ray說。訪問當天，Venus右膝瘀了大片，小妮子不意為然，照舊日操百下拳上壓， 風雨不改，耐痛又刻苦。
Ray說：「佢15歲開始跟我學泰拳，嗰時只係𡃁妹一名，100%係搞事份子，我成日笑佢有二級公主病，嚟到學拳，唔肯跟住熱身，有時練得辛苦少少，又會發小姐脾氣。」來自基層家庭的Venus，中四輟學，三兄弟姐妹之中，排行最小，爸爸做裝修，媽媽做清潔，為口奔馳。雙失小女生每日過着失焦生活，練拳，一為keep fit，二為發洩。
「以前好唔鍾意返屋企，逢夜晚就同班friend喺公園坐通宵。」Venus說。面對這名反叛少女，Ray大感頭痛，「初時叫佢嚟拳館幫手，係權宜之策，希望佢有多啲責任感，唔好搞事，點知佢越做越起勁，仲主動帶住啲師妹練拳，我先發現，呢個𡃁妹唔搞事時原來做嘢好認真，打拳仲好有天份。」
師徒關係越來越好，視拳館為家的Venus，有次同Ray說：想上擂台！「佢主動問我，話想出賽，希望贏到名次，幫拳館揚名，最初我諗住佢只係玩玩吓，諗唔到佢原來好認真，教完學生，一個人練到半夜；再唔係一有空檔，就做拳上壓操體能。」亦師亦親人的關係，令Venus脫胎換骨，成就了今天成為打不死的女拳王，絕非偶然！
