潘永成積極備戰5月的三項鐵人賽，荃灣海濱公園是他每天練習的地方。陳奕釗攝
辭去行政工作，專心做全職教練，Stephen又與朋友合資開單車店，重新開始。
跑馬拉松，曾幾何時，係我生命中最重要嘅事。25歲，我先開始接受系統訓練，起步比人遲，但短短五年，我嘅成績已喺華人運動員之中排第二。成績好，自然心雄。一星期七日，練足六日半。急於求成嘅結果係，肌肉嚴重勞損，一次拗柴，近股骨位置肌肉撕裂。從此，唔好講跑步，連行路、上樓梯，都感到痛楚。
由高峯跌下，好消沉，成日懷緬過去，冇晒目標。心情唔好，同屋企人關係變得緊張，鑽牛角尖，好抑鬱，甚至想過自殺。兩年前，傷勢稍為好轉，有個跑友叫我幫手教跑步班，對象只係小朋友，冇乜壓力。慢慢，我再次接觸番跑步。今年2月，又係一年一度嘅渣打馬拉松，過去幾年，我只係睇住其他人跑，今次，我決定親身上場。
今次係我受傷後第一次再參加公開賽，順利完成賽事，成績當然唔能夠同高峯期比，但重踏跑道嘅感覺，令我好振奮。突然之間，我好想人生有一啲改變，有別於每日返工、朝九晚五嘅生活。啱啱嗰時，我有個朋友想要搵人合資開單車店，我同太太商量，決定辭職，做自己鍾意嘅事。
或者，心底想追番失去咗嘅五年。我深知高峯已過，做唔成職業運動員，但我可以轉做職業教練，培訓其他運動員。除咗技術，我仲可以用我自己跑馬拉松受傷嘅經驗，教其他人，點樣喺逆境下重新站起嚟。除咗馬拉松，我又積極備戰5月嘅三項鐵人賽。只要唔放棄，我深信，人生仍然有好多選擇。
