上個星期日嘅女皇盃，由日本代表「統治地位」捧走，贏對手三個幾馬位。人哋贏得咁精彩，只能夠讚佢哋嘅準備工夫做得好，一早就話嚟參賽，嚟到香港後晨操快跳、踱步做齊，實行全套操練做晒才迎戰。
相反，其他外隊馬遲一遲先到埗，唔影響狀態就假喇！香港嘅天氣又熱又潮濕，住慣喺香港嘅人都覺得好難頂，更何況外地嚟嘅人同馬呢？所以睇準備工夫，某程度都睇到「統治地位」幕後好想捧盃，結果如願以償。
至於今個星期日嘅冠軍一哩賽，最早到港係高多芬馬房嘅「非洲傳說」，練馬師蘇萊亦已經喺今個星期初到港督操，落埋跑道睇實隻馬操練，動態好緊張。呢一幕令我諗起此廐前屆香港瓶冠軍「技藝精湛」，練馬師都有一樣嘅動態。
今場其實我最睇好應屆香港一哩錦標亞軍「都市風光」。上次佢嚟香港只係輸條頸位畀老馬「步步穩」，之後部署跑杜拜免稅店盃，結果大勝對手四個幾馬位而回。佢𠵱家狀態咁弗，挾新勝之勢，再嚟香港跑肯定為報番上次香港一戰之仇，兼且要為馬主鴨都拿王子爭取一場香港嘅勝仗！
電車男
