上周與外母等提早慶祝生日兼母親節，席間兩位親友同老樓談論樓價，當中一名住在青衣夾屋的舅母大人。「自己住緊的屋苑近月創新高價，價錢仲高過對上一宗更優質的單位，我估計都是地產代理冇畀其他盤給買家睇，令到價位超離譜，我自己都唔信出現呢個價。」
另一位大姨媽本來有一層自用三層樓收租，對荃灣一個近西鐵站快開售的樓盤有興趣。「𠵱家荃灣市中心西移，近楊屋道和沙咀道一帶已經好旺，日後樓價必有再升空間，已經有地產代理問我有沒有興趣入市，鎖定這個新盤，首批價錢一定好吸引。」
老樓對住兩位街坊樓神不敢畀太多意見，一個看淡一個看好，由於每個人買賣樓的需求不同，只要憑自己的眼光和實力入市，身邊塘邊鶴未宜參與。昨日回來睇番二手市場的成交，依然乾升，破高位兼重回97價，但是仍有新盤蝕讓，這又何解呢？老樓認為反映個別非實力人士已經到了警戒線，選擇輸少當贏。
劉兆昌
www.HKLau.com
