美股前晚埋單無乜升跌，但道指期貨前日喺港股交易時段跌逾100點，最後道指埋單唔使跌，照計港股可反彈200點以上，點知開市只有100點，之後仲無晒力，搞到倒跌。亞洲大部份市場都有進賬，大陸股市噚日反跌，港股就跟跌唔跟升，市底真弱。
滬深300指數連升4日後噚日終於跌，上周小郭提過兩隻完成集資嘅滬深300ETF會買貨建倉。踏入5月後5個交易日，滬深300指數成份股每日成交介乎720至920億，比平時多幾成，相信係因為基金建緊倉，帶動股民跟風短炒。
噚日有消息話，華泰柏瑞嘅滬深300ETF前日倉位已達七成，噚日將完成。嘉實滬深300ETF前日正式成立，認購人數88720，創出6年來ETF認購紀錄，嘉實未來數日開始建倉，對滬深300指數繼續利好。
收股息 今日要買貨
噚日買到中石化（386）平貨，真係多謝大陸諮詢公司安迅思息旺能源。佢哋噚日早段引述國家發改委消息話，噚晚會宣佈減油價，搞到中石化股價曾經跌到7.82元，小郭買到貨博反彈，但尾市呢間公司又話，發改委會議同下調成品油價無關，認真幫得手。
友邦（1299）股價又回到27元，明日除息，要收0.22元股息嘅股民今日係最後機會買貨。噚日見到有散戶喺27元排隊，但呢個價無見過。仲有，後日恒指成份股季度檢討，友邦因之前大股東美國政府配咗15%股份出街，街貨量大增，令到友邦佔恒指同埋大摩指數嘅比重將會增加，嚟緊指數追蹤基金必買，小郭都買番啲炒吓。
郭金嵐
資深投資者
