歐洲政局變天，環球股市由亞洲開始，一路跌到歐洲同美國，恒指噚日冇咗500幾點，創近半年最大跌幅。
上星期仲諗住個市有機會挑戰今年高位，點知話咁快又碌番落嚟，認真慘情。個市陰晴未定，不過個別股份依然好硬淨，利君國際（2005）係其中一隻。
截至去年底止，利君全年蝕4140萬銀，主要因為大輸液業務預期毛利率下跌，要就商譽減值撥備2.24億銀，由於唔影響現金流，所以照派末期息兩仙。集團早前公佈首季數據，營業額6.1億銀，按年增長12%，毛利率就微跌至42%。
不過，主打業務靜脈輸液就認真巴閉，按年增長超過三成，反映公司仍處於增長期。另一個利好因素，就係集團出手回購，作價介乎1.56至1.61元，證明物有所值。
昨低位有買盤吸納
利君噚日一度跌逾半成，但低位有買盤吸納，收市僅跌1.7%，跑贏大市。事實上，利君股價依然於高位徘徊，相反恒指已創近一個月低，高下立見。
各位戰友可候1.7元水平吸納，目標博見2元，跌穿1.6元止蝕。
唐牛
獨立股評人
