歐洲政局變天，股市群熊並起。法國同希臘周日大選，其中法國一如民調結果，社會黨奧朗德勝出，佢認為單靠緊縮救唔到歐洲，要有刺激增長嘅措施，市場擔心佢同德國提倡嘅路向唔同，歐元區團結出現問號。
不過，奧朗德提出嘅都係修正，唔會話改頭換面，最多要用啲時間磨合，所以債市投資者反應好平靜，法國10年國債孳息喺噚日大概2.8厘左右，仲低過4月首輪投票時嘅3.1厘。
希臘反而大鑊啲，出乎意料，𠵱家嘅執政聯盟攞得37%國會議席，唔夠一半，除非同今次大選大贏家──極左嘅左翼政黨聯盟；或者極右嘅納粹金色黎明黨合作，但呢兩個黨講明反歐盟，要推翻之前達成嘅協議。
咁嘅局面，可能組織唔到政府要重選，政府運作可能癱瘓，分分鐘做唔到削赤目標，歐盟一定唔肯「科水」救希臘，淡友即刻可以用歐元解體做藉口，歐股先散，但歐元就喺1.3元水平掙扎緊，暫時頂得住。
歐洲形勢差，但大陸股市噚日走勢「靚絕人寰」，滬股無升跌，深股逆市升近1%，兩市成交亦增加。
噚日，「西風壓倒東風」，大陸股市竟然帶唔起港股，係近期以嚟少有嘅，反映港股市底弱咗啲，但係個別股份都仲幾強。
中石化$7.8有支持
中移動（941）噚日好硬淨，跌得少，如果唔係，港股大瀉都似，睇嚟除息前，唔少「好息之徒」仲會逢低買。中、工、建三大內銀股亦見到散戶血肉長城，買股收息。
小郭都喺低位買啲博反彈，但唔一定揸到收息。中石化（386）跌到8元，7.8元應有支持，亦可博反彈。
郭金嵐
資深投資者
