全球三大經濟區──中國、美國同歐洲嘅經濟政策話事人，噚日分別蒲頭。
中美?北京舉行高層對話。正如前大摩亞洲主席羅奇高呼：「忘記人民幣」，𠵱家焦點係貿易同市場准入。
以前中美經濟模式係「中國製造，美國消費」；𠵱家調轉，中國想消費，美國搵番製造業，做新增長點。炒人民幣升值已經唔係潮流。
中國未來以消費主導，買高科技嘅興趣好大，正係今次對話焦點。
副總理王岐山開口話，希望美國放寬向中國出口高技術產品嘅管制；蓋特納亦希望，中國經濟政策更重視內需。
噚晚歐央行會議焦點亦轉咗講增長。市場預咗唔會減息，歐央行行長德拉吉上周話，歐洲要有增長條約。自從英國雙底衰退；西班牙大緊縮搞到民不聊生。歐洲佬明白Plan A（Austerity 緊縮）救唔到歐洲，一定要加Plan G（Grow 增長）。既然中國恨買高科技，恨到流口水，如果歐洲肯賣，一定賺到唔少錢。
大城市房價首雙降
講番中國內需，最大消費一定係住房。最新4月100大城市住宅平均價首次雙降（即係同舊年4月或今年3月比都出現下跌）。仲有，上海部份銀行叫停首套房貸利率八五折優惠。
雖然壞消息不絕，但內房板塊噚日逆市上升，中海（688）、華潤置地（1109）同恒大（3333）等大股靚絕全場。外圍弱勢加埋行業壞消息都唔驚，內房股免疫能力之強，小郭唔單只唔獲利，仲加咗碼。
郭金嵐
資深投資者
