今月股市果然好chok，中港股市噚日早段低開後牛皮，10點半滙豐公佈中國4月PMI由低位回升，中港股市反彈一陣又跌過，因為大陸創業板跌到散晒，埋單跌咗5%，市傳創業板退市制度下個月實施，嚇到啲退市高危股狂跌，睇嚟中證監主席郭樹清對股市進行大整肅好認真。
相反，郭樹清前日喺廣東省調研時話，正研究緊B股公司嘅發展問題，B股噚日逆市大升2.4%。可惜A股跟創業板跌，都唔肯跟B股升，搞到港股早段陪跌。
歐洲唔掂 港股實受累
3點後大陸收市，到歐洲進場。前日法國總統大選，薩爾科齊唔夠票連任，要同社會黨對手下個月再鬥過，但呢個民意領先嘅對手主張重新傾過解決歐債危機嘅方法，加埋荷蘭政府就緊縮措施達唔到共識，可能要重選，政治咁唔明朗，歐股開市梗唔掂。
挨近3點半，德國4月PMI數據出籠，製造業指數由3月48.4急跌到46.34，出現近3年嚟最快速度嘅收縮。連龍頭國家經濟都出問題，有乜理由歐股唔散呀！港股實畀佢拖累，最後要跌差唔多400點。雖然全日成交只有435億，但港股有三分之一成交係3點歐洲開市後造出嚟。而且期指成交全日高達82000張，成交喺最後一個鐘急升，淡倉開得好勁。
美股期指上周五啱啱轉完倉，總結上月美期市況由上升轉為橫行，噚日市況突變，唔通美股期指大戶部署緊新方向？唔少大股嘅技術走勢噚日已經破壞晒，向下之勢明顯，小郭一直估恒指喺20000至21000點上落，但噚日一日跌400點，顯示大市唔只波幅趨升，轉變速度亦快咗，等跌近20000點再買貨，目標揀華能（902），噚日跟大市回落，跌近4.2元支持位買一注。
郭金嵐
資深投資者
