報載，鏞記燒鵝飯，竟然唔夠大家樂貴，好多人嘅即時反應係「有無搞錯」，YY無乜特別反應，淨係憶起當年做暑期工第一次出糧獎勵自己嗰碟鏞記燒鵝飯。
那一年，YY喺全香港食晏最貴嘅中環打暑期工，為自己嘅吃喝玩樂籌吓水腳，對為食嘅YY嚟講簡直係人生最大嘅鍛煉，因為中環食晏貴到爆，於是，食得最多就係老麥漢堡包，無錯，係一個漢堡包無跟餐㗎﹗
咁碰啱嗰間公司啲大人又好鬼死孤寒，無話請YY呢個小朋友去食吓嘢咁，於是遠近馳名同YY一街之隔嘅鏞記燒鵝，YY隔住玻璃望足三十日；卒之，出糧，YY一條友懷住既興奮又盼望嘅心情去試鏞記燒鵝（其實係喺地下大堂搭晒檯食一碟燒鵝飯）。
嗰碟飯，YY用咗呢生人食嘢最慢嘅速度去品嘗，味道無得頂﹗因為係自己賺番嚟享受嘅，啲燒鵝特別皮脆肉嫩﹗食完，再企喺鏞記對面，一路飲住帶定嗰罐已經唔多凍嘅可樂，一路再隔住塊玻璃欣賞掛喺度嘅燒鵝，好滿足好快樂……可惜，呢種傻戇，已經無晒了。
YY
