【本報訊】楊怡與羅仲謙大前晚被拍得由紅磡往將軍澳領都的40分鐘車程中，楊怡幾乎全程伏在謙仔兩腿間。二人昨在無綫高層樂易玲及曾醒明陪同下，並肩於將軍澳電視城解畫。主力發言的楊怡率先表示，當晚與藝訓班同學飯敍時喝了很多酒，為免醉酒駕駛，故請謙仔去接她。在謙仔告知疑有狗仔隊後，楊怡即與張美妮及趙永洪等同上的士，到美妮家落車後再上謙仔車。楊怡續說：「我喺的士度已經嘔同斷晒片，落的士嘔晒喺地下同暈，作為一個藝人，飲醉嘅過程係冇人想俾人睇到，而且對於自己信任嘅人嚟講，我瞓喺佢大髀度，絕對係無庸置疑。」

楊怡又解釋：「佢去到我屋企個閘口同我講『阿怡阿怡醒喇，有狗呀』，我第一時間揞住塊面，戴番頂帽，不過飲醉嘅人瞓低好哋哋，一起身即刻想嘔，咪拎起佢可能等我等得耐買咗嗰碗麪，打開個蓋喺裡面係咁嘔，嘔完之後嘴濕濕，咪係大家所報道嘅嘢。」羅仲謙接着說：「佢一上車已經暈暈哋，伏咗喺我大髀度，我責任係送佢番屋企，揸得好安全好慢，亦都冇扶開佢，我怕佢會嘔同好辛苦。」他謂發現有記者即通知楊怡：「佢咪戴番頂帽坐起身，佢一起身就嘔，好似佢咁講嘔落一碗諗住等佢嗰陣想食嘅麪。」他承認沒為楊怡扣安全帶：「我都唔啱，見佢伏喺我度咁舒服就由佢，應該擺佢喺後座。」

楊怡稱覺得委屈故曾哭泣，又稱藝人會有分寸不會在公眾地方做出這種行為，也不擔心再有照片流出：「我唔介意攞出嚟睇吓，因為我冇做過。」她謂已諮詢律師，保留法律追究權利。二人還不承認拍拖，楊怡說：「我哋處於互相了解同順其自然嘅方向裏面。」謙仔則謂隨緣：「我對阿怡將來係正面咁培養感情。」
此外，楊怡胞姊楊卓娜昨在電視城表示：「我都唔知乜嘢事，冇嘢講，唔關我事。」又謂很忙沒致電妹妹。楊怡前緋聞男友黎諾懿則說：「以我識楊怡係唔會咁做，會唔會係飲醉酒。」他認同行車時伏在司機大腿不安全：「不過無論發生乜嘢新聞，對女藝人都係唔好。」